السلام عليكم
:::
::
:
اليوم جايب لكم قصيدة للشاعر المعروف
محمد الدحيمي
وأسم القصيدة
الملحمة
لكن قبل ماتقرونها بأقول لكم قصتها
يعني كعادة الشاعر بقصائدة المثيرة للجدل
هذي القصيدة يخاطب فيها ناقة تتكلم
أو بمعنى أصح يخاطب شاعره من الجن
أسمها أبكمه وتتمثل أمامه بناقة تتكلم
وقد فزع من نومه لصوت دعاه وقام ليجد هذه الناقة
ويصف لها حبيبته أما كيف و وش اللي صار
هذي أنتم أقروها بأنفسكم
تفضلوا
= = =
ليلة البارح رقد بعضي ينازعـْـه أغلبي
ليلة ٍ بآخر ليال الحج غدرا مظلمه
كني اللي نايم ٍ مابين داب وعقربي
هي حقيقه هي خيال ٍ سج؟ هي حلم ٍ أحلمه
قمت من صوت ٍ دعاني وانثنيت على ركبي
والا انا اناظر قبالي ... ناقة ٍ متكلمه
يانيازك لو عرجتي فوق دخان أشهبي
علقي في زئبقي في مارج ٍ متنجمه
قلت وش قومك وش انتي واصدقي لاتكذبي
جاوبتني شاعره من جن وانظم مبهمه
وقبل تنشدني ترى اسمي ابكمه ياصاحبي
وأدّر كانك مادريت ان اشعرالجن ابكمه
اسكن "البرلس" على وادي يسمـّى المحلبي
في نهاية طور موسى جل رب ٍ كلمه
جيت ابسمع منـْـك شعر الوصف وآشب إلـهبي
كان توصف مثل جدك ياعسى الله يرحمه
جدك اللي من سمع شعره ذهل واستغربي
مثل وصفه لآجمل سنينه بـ نوق إمدرهمه
قلت حياك إرحبي ثم أرحبي ثم أرحبي
في ضيافه شاعر ٍ يثني القصيد ويلجمه
شاعر ٍ ورّد هواجيسه على ماهو يبي
واعذب الشعر أصدقه في أغربه في أجهمه
من شيوخ ادحيم جدانه وخاله تغلبي
ان طلع عز وشرف وإلا طمن في مكرمه
قد ورثت الطيب قبل الشعر من جدي وأبي
ولابتي سيل الحقوق اللي تزابر مرزمه
واشهد اني من سنام الشعر دسـّـمت إشنبي
وهاتي اشعر شاعر ٍ بالجن نذر ٍ لآفحمه
ودام يستهويك شعرالوصف بانظم وأطربي
ع القوافي نفسها قدامك الحين أنظمه
واصف ٍ حلو الترايب والقوام الاكعبي
وابتدي بسم الله الرحمن سمعي ياابكمه
جادل ٍ بحجاجها فجر ٍ زبنه المغربي
عنز ريم إنثرتني بين خرز وسلهمه
في سواد اعيونها فاجر يقول انه نبي
كل صابي يتبعه وايصدقه يهدر دمه
وفي لحظـْـها حاكم ٍ سفاح متهور غبي
يطلب الرحمه لميته يوم شبع إمن إلحمه
وفي هدبها مدهل ٍ راعيه شيخ ٍ يعربي
اجودي ٍ نوب يعزمني ونوب أعزمه
راعني خال ٍ بوجـْـنتها تقل ْ عبد إمسبي
حارس ٍ روض الزهر من كل يمنا مجرمه
ومن قليب اللون جا ثعبان فضي لولبي
من لعق سمه يقول الشهد مر وعلقمه
كلما بلل شفق ْ عنـّـابها قال أعجبي
راح ينشد لولها هي مشركه هي مسلمه
يوم جا اللول إبـ يجاوب قلت ربي روف بي
ناض براق الثمان وسال وادي عكرمه
الندى عود ٍ غدا بأوجانها طفل إيحبي
والعطر ْ راعي بأثرها إيحدي إبله واغنمه
ومن جدايلها تجلاّ فارس ٍ قال إلعبي
واستفزي الريح يابنت الهبوب المدهمه
وفي نحرْها كافر ٍ لعيوني إيقول أذنبي
كل ماياكل رطب شوفي حذفني بعجمه
في ترايبها ثمر طاح إبنهم عين أشعبي
جا يقول إلخصرها المياس حذرا مااتهمه
انثنى الخصر وتمايل قال قلبك مرّبي
توه اللي كان ضيفي وانظر آثار إقدمه
الجمل هج وتذيـّـر يوم شاف الاحدبي
الحدب قال اش معه ْ ماينظر الحدب إسنمه
كل نظره روّحت حبلى تجي معها صبي
راح جوعه ينشد امه وش بلاها تفطمه
لامشت في مشـْيها خطو الكحيل الأشهبي
انثنت حايل ثنيـّـه لا رباع ولا اقحمه
كنها لا لدّت النظره خجل عـ المنكبي
صادق ٍ يستودع الفتان سر يكتمه
في خجلـْها بنت شيخ ٍ طاحت إبحب اجنبي
في غنجـْها مهرة ٍ تتلي الصهيل ابهمهمه
في رضاها حصني يتلذذ بمحض اعنبي
في عتبها ظالم ٍ حطوه قاضي محكمه
لااقبلت مثل الحمام ولا ادبرت مثل الظبي
لا اوقفت طير الهداد ولاجلست تقل ارخمه
لا وردْتي يامغاتيري على العد ّ أشربي
وهيجني ياحي ذا المبسم ومنهو مبسمه
مبسم ٍ يوم ايتبسم كل عرق ٍ صاح بي
و تلني قوم ألثمه نذر علي ّ إن تلثمه
اذن الفجر و وقفت إلا .. ابكمه تقول اطلبي
يالدحيمي هالقصيده سمها بالملــحمه
= = =
طبعا القصيدة رائعة وتحتاج ثقافة لقرائتها فما بالكم بكتابة ما يشابهها
رائع الدحيمي دائما ولا يظهر منه إلا كهذه أو أجمل
ولكن خف وهجه بالسنين الآخيرة
والحقيقة القصيدة رائعة ولكن يعيبها كثرت الابيات التي بها
ثقل أو ضعف أو حتى كلمات يصعب رفعها للميزان إلا بلسان الشاعر نفسه
مثل نهاية الشطر الاول من البيت الثالث ومثله الكثير
ولكن يسمح للدحيمي ما لا يسمح لغيره
منقول
تحيااااتي
ناقة تتكلم .
رد: ناقة تتكلم .
العرض العادي
