يوم قالت انتم بدو

~~الوفية~~ · 24-07-2007, 03:35 PM

هذي قصيد للشاعر طلا السعيد
اتمنى انها تعجبكم

القصيدة بصراحة تنم عن غضب شديد
ويا ليت اللي بيقراها يتفكر معانيها زين
ويتفكر الصدق اللي فيها

الى من قالت بدو

وقالت بدو
وصدت وقالتها بقرف
بنت الأكابر والترف
متكبره .. متعاليه
يعني بدوي يقعد طرف !!

قالت بدو
والمعنى دون المستوى
ماحنا وياها سوى
احنّا بنظرها من نكون ؟
ريشة يطيرها الهوى

مفهومهما حنّا عدد
رقم ولا أكثر بعد
يعني مجرد تكملة
ولا فهي أصل البلد

قالت بدو
تعني صفر على الشمال
هذا على أحسن احتمال
تصدر حكم ، ما تلتفت
تحكم ولا تترك مجال

قالت بدو
متصورتني باستحي
وأترك مكاني وانتحي
وتفاجئت ، تغيرت ، تلعثمت
ما تدري أني بافتخر
ولي الفخر !!

حنّا بدو
حنّا عمى عين العدو
حنّا البداوة وضعنا
وأهل الوفا هم ربعنا
حنّا نتفاخر بأصلنا
يا بنت هذا طبعنا

ماهي بداوة تلفزيون
ولا مسلسل أردني
بس بدوي بالميكرفون
ولا هد سيفه ينثني
ولا بدو بيت السدو

حنا البدو
حنا بداوتنا الأصل
بالقمة حنّا مو أقل
حنّا بداوتنا تراث
من جيل لي جيل انتقل
حنا معاني ساميه
نروي السيوف الضامية
نرد المنايا ما نهاب
لو هي سعاير حاميه

حنّا بدو

حنّا البداوة عيدنا
ما ناكل إلا صيدنا
ما نعيش عالة مجتمع
نموت .. ما نمد أيدنا

حنّا البدو

حنّا البداوة بدمنّا
ما نسمي أحدٍ عمنّـا
حتى ولو منهو يكون
لو هو زعل ما همنّا

حنّــا بدو

حنّـا البداوة عمرنا
ماحد بيصبر صبرنا
لأنها مصنع للرجال
نمشي وتمشي بأمرنا

حنّــا البدو
حنّا البداوة أصلنا
حنّـا البداوة فصلنا
حنّـا بدو متماسكين
وهذي نتيجة وصلنا

يا بنت ياللي تضحكين
قلتي : ابدوي تستهزئين؟
غرج لباسج الأجنبي
والمشكلة ما تعرفين
أن البدو أصل العرب
تبغين هالكلمة طرب
صارت نشب

يا آنــســة
يـا عانســة
يا ضايعــة ومستانســة
يا تارسة وجهج صبغ
يا تارسة عينج شدو
حنّــا البدو
ولو كان قلتيها بقرف
لنا الشرف
أنّــا بدو

حنّــا بدو
حنّــا بداوتنا شيم
ديــن وقيّــم
معنى كبيــــر
ما أظن مثلك يعرفه
لو تدعين المعرفه
شي عسيـــر
ما أظن مثلك ياصله
صعبه ولاهي حاصله

كلمة بدو !!
تعني التمسك بالجذور
ماهو التخلف والجهل
ولا بعد حب الظهور
ولا التنكر للأهـــل

كلمة بدو
تعني الشمم
فعل وكرم
مبدأ حضارات الأمم
حنّــا القمم
نارٍ على راس العلم
يشهد لنا سيف وقلم
وإن كان ما عندك خبر
لنا الفخر

لو عشنا ببيوتٍ شعر ..
عيشة ألم ..
عيشة فقــر ..
عيشة تعلمنا الصبر
ما نقترض لجل السفر
ونحسّب أيام السفر
ما نفترض
ونعيش واقعنا بحذر
وبالضيق نرخص بالعمر
نشرب من الماي الهماج
ونكحل نواظرنا بعجاج
وغسيلنا حفنة رمل
هــي الدوا
واهي العــلاج
عيشة رضــا
ماهي نكــد !!
ما فيها تعقيد أبد

ساعات ما نلقى ذرا
يكفي نتلحف بالنجوم
وفراشنا رمل الثرى
وسراجنا نور القمر
لا من ظهــر
وننام من عقب العشا
ونصحى قبل وقت الفجر
نؤمن بقضانا والقدر
ماهو كســل
ولا نعيش بلا أمــل
نملك طمـــوح
علــم وأمـــل
ونرعــى الإبــل
ونــرعى الغنم
ونعزف من الونه نغــم
ونتابع أخبار المطر
وندوّر الروض الخَضَر
ونسري ورا
برقٍ سرى
ولا نتراجع للورى
ونبحث عن المرعى العشيب
ومن شعيب إلى شعيب
ما نستقــر
عنواننا كل الديار
تجوالنا ليل ونهــار

نعيش عيشه هاديه
وهذي حياة الباديه
سنة الربيع ، سنة دهر
ورغم الفقر
نخاف من قولة أفا
ونتعب على قولة نِعِم
ونعيش عاليين الهمم
من فضل ربي ما نخون
نرعــى الذمم
ونركض ونتعب ما نمل

ماحنا مثلك لا شغل ولا عمل
ما غير بس أكلٍ ونــوم
ومن الشحم ضاقت عباتج والهدوم
يا أسمن أنواع الحريم
يا عايشه على الريجيم
يا آنــســة
يـا عانســة
يا ضايعــة ومستانســة
يا تارسة وجهك صبغ
يا تارسة عينج شدو
حنّــا البدو
ولو كان قلتيها بقرف
لنا الشرف
أنّــا بدو

ياللي تقولين ابدوي
أنا ابدوي
ولي الفخر أني ابدوي
عزمي قوي
ما أخون
ما أبوق الخوي
يبدأ نهاري بالصلاة
وأصارع أمواج الحياة
ما ضاقت الدنيا أبد
ولاني من أصحاب الحسد
أرفع ايديني للسما
وأطلب من الله واستخير
ما اقول يمكن ربما
ولا يصير .. أو ما يصير

محافظ على الخمس الفروض
واضح ولا أحب الغموض
ولا أتلون والتوي
لاني ابدوي
متمسك بأصالتي
ولا أغير لهجتي

أنا ابدوي
في فزعتي
وفي قومتي
وبقعدتي
وفي مشيتي
وفجلستي
وفي كلمتي
وبنخوتي
وحتى عقالي ولبستي

ولو قلتي عني فوضوي
ما ضرني
بالحيل يا بنت ابدوي

ويسرني أعرف .. من أنتي ؟
ومن أنا ؟
والفرق واضح بيننا

تدرين وأدري من أكون ؟
ويكفينا نعرف بعضنا

أنتي مثل عمر الزهور
مالك عمر
مالك سنين
شهرين ويجيك الجفاف
وتذبلين
وتصبح ألوانج باهتة
وأنا جذوري ثابته

ماخذ من الصحرا الهدو
وإن كان هذا يسعدج
حطي على راسك يدج
هالمرة لا قلتي بدو
يا تارسه وجهك صبغ
يا آنــســة
يـا عانســة
يا ضايعــة ومستانســة
يا تارسة وجهك صبغ
يا تارسة عينك شدو
حنّــا البدو
ولو كان قلتيها بقرف
لنا الشرف
إنّــا بــــــــــــــدو

دلووو المملكة عة · 24-07-2007, 03:52 PM

والنعم بالبدووو احسن ناس

سلمت يداك الوفية ياقلبي

انتظر جديدك

Oo قاهرتهم oO · 24-07-2007, 05:04 PM

وربي لنا الشرف اننا بدو
عجبتني القصيده مررررررررررره
اكيد بتعجبني من وفيتــــــــــــــــــــــــي
تحياتي

~~الوفية~~ · 24-07-2007, 05:10 PM

هههههههههه يسلمو ياعمري وقلبي امووووووت انا
ايوة بدو هم الاصالة كلها ويرفعوا الراس

pretty girl · 24-07-2007, 06:21 PM

كلمة بدو
تعني الشمم
فعل وكرم
مبدأ حضارات الأمم
حنّــا القمم
نارٍ على راس العلم
يشهد لنا سيف وقلم
وإن كان ما عندك خبر
لنا الفخر

والنعم والله

الله الله رووووعة من القصايد إللي أحبها

أهنيك على ذوقك 00
يعطيك 1000 عافية 00

يارا · 24-07-2007, 07:05 PM

حنّــا البدو
ولو كان قلتيها بقرف
لنا الشرف
إنّــا بــــــــــــــدو

حنــــــــــــــــــــــــــا بـــــــــــــــــدو ونفتخر
يعطيكِ العافيه
الوفيه سلمت يدااكِ

رفيق الشقا · 24-07-2007, 08:15 PM

شكرا لك

والنعم في البدو والحضر

والناس كلهم لآدم وآدم من تراب

لك التحية والتقدير

~~الوفية~~ · 25-07-2007, 03:54 AM

اكيدد كلنا لأدم وادم من تراب ومافي فرق الا بالتقوي
بس هذا رد علي وحدة تنظر للبدو بانهم جهال علي العموم يسلمووووو علي المرور يارفيق الشقاء

احلاهم واغلاهم · 03-08-2007, 04:31 AM

قصيدهـ.,’ اكثر من رآ’ئعهـ.,,’ لشآ’عر كبير...

يعطيكـ.,’ الف عآ’فيهـ.,’ عالنقل..

تحيآتي لكـ.,’

حسووسهـ.,’